سلام عليكم جبتلكم اليوم بوقالات من قلب الجزائر
اختارو قبل النزول من 1.........27
/
/
/
/
/
/
/
بسم الله بديت...... و على النبي صليت ..... يا ربي كملي واش نويت
1- دزيت باب الرياض ...والنسري ناداني... والورد فتحلي الباب ...والزهر عانقني ...والياسمين ذالك الشباب هو لي معذبني
2- ما نديها طويلة ...سلوم راشي .... ما نديها قصيرة.... فكرون ماشي.... نديها مربوعة قد... كي علم الباي ماشي
3- مشيتي عالية... وطولتي دالية... شبان ورجال ... يتبعو فيا ويمشو مذلولين ...مثل حمير القرية والبادية...ومن غير المولى وحبيبو
ما في مين يعلى عليا
4 - خرجت في الليل ...نطلب في الله ...صبت النجوم دايرن ... وقالولي صلي على رسول الله...*ص*... ولي تستناهم راهم راجعين
5- قالي طبيبي ...بلاما يدري تداوى يا عليل ....ودائي ودوايا عند حبيب لمحبتو بخيل .... وقتاش يا عمري ترحمني ...وترحم دموعي
لي تسيل؟؟؟
6- الاسمر يا لسمر ...يا شباب الحومة ....وشبيك غضبان وزعلان علينا.... احنا ما نسوى
بلا بيك... لوجه ربي... راضينا وراضى علينا
7- قريب الرفيقة ...يا قريب الرفيقة ...بيني وبينك طويقة ... يا مخلي في قلبي شقيقة
.... تروح وين تروح... بصح تعيا ترجع ليا ونرد لقلبك الحريقة
8- ما ناكلش من جنان الجنة لو يشهيني ....وما ناخذش الشيخ ولو يغنيني...ناخذ الشباب
بيض ولا سمر ...المهم هولي يملالي عيني
9- دزيت باب الحبيب ...دفة على دفة... فراشو من حرير نرقد وندفا .... بوقالو من ذهب
نشرب لا نروى... وكلامو من عسل ...غير نذوق نشفى
10- انت سبيبط.... وانا خويط فيك.... انت سنيسلة.... وانا خمسة تحميك ... انت خويتم
وانا حجرة تبهيك ...وين تروح تلقاني وغير انا لي نديك
11 ـ هبط لقاع البحر ، فرّشت زربية ، خرجت لي جنية ، قالت لي واش بيك يا بنية ؟ قلت لها راحوا حبابي و خلاوني وحدانية .
12 لو كان السعود تنغرس بالعود نغرس ميات عود في وطيّة ، لكن السعود بيدّك يا معبود . يا سقام السعود سقم لي سعدى. ـ
13ـ رشّيت عتبة الباب بالزهر و الطّيب ، وسقيت كل الأحباب بالعسل و الزبيب ، و كى نسيت جاني جواب كنت نستناه من عند البعيد .
14ـ مدّيت لقاع البير و فرّشت زربية ، حرقست حرقوس ذهب من راسى لوذنية ، فرحي يا يما سعدى زها ..و استشفاي في العدو إلي استشفى في
15 يما يما ديريلي تويقة في وسط الحديقة باش نشوف زهرى كي تجيبو ذيك الوريقة .
16ـ ديديويا..ديدو..أنا سعدي مليح ، قنديلي ضاوي ، البنيان إلى بنيتو قع سجالى ، بنياني فوق غرفة و لي يخصني يكملهولي العالي .
17ـ الدالية دلات ..و دلّ العنقود ، خلي القمر ينكشف ، والسحاب يذوب ، و خلي لالات النسا تنال المرغوبـ .
18ـ خرجت نهار الجمعة ، في يدى شمعة ، قالولي أمسحى ذيك الدمعة ، و انساي الخلعة ، قريب يتلموا احبابك و صحابك و يفرحوا معاك الجماعة
19ـ ـحوم حوم يا حوام ، حوم فوق السطح العالي ، و قول لها يا لالة يا زينة لبنات و خدودها براقة ، و عيونها غرّاقة ، صارت كل القلوب ليها سبّاقة .
20 يا شمس واش بيك ذابلة ، إلا لابيك الزين راني نفكر فيك ، و اذا بيك الزهر ربي ما يتخلي عليك .
21 ـ محبس منقوش ، مربي على الفشوش ، ما يحمل الهانا ، أصبر يا خاطري حتى يفرّج مولانا .
22 ـ جزت على جنية ، قالت لي واش تحوسي يا ولية ، قلت لها مانى نحوّس لا على مال ولا على جاه ، نحوس على من ضيّعت قولي لي .
23 ـ جايز على باب دارنا ، لابس تلمساني ، قتلو يا شيخ بالاك تنساني ، قاللها والله ما ننساك ، ونصيبك على ربي جاهي و سلطاني .
24 ـ امّنت بالله ، و المنام رؤية من عند الله ، حمامة بيضا جات ترفرف عليّ ، معاها حصان توقّف بين يديّ .
25 ـ نبعث لكم دموعى في مشوار ازرق ، و نبعث كلامي في برية تحرق ، ما ننساك يا ناسى بحق مكة و بلاطها لزرق .
26ـ سمعت قر الحمام في قاع السّجنة ، لا من سقاه الما ولا من طاه شعير ، يا قمر ..الحمام يعيا و يحن ، وتتعمّر النافورة ، ونعودوا لزمانا
كيما كنا
27ـ خرجت ليلة الجمعة ، في يدى شمعة ، خرج لي ملاك حنين قالي : يا بنت السحاب حاجتك راه مقضية ، قلت ليه : يا سيدي طالت المدة ،
قالى : روحى لدارك تصيبيها قدّامك .
اتمنى ان يعجبكم الموضوع والردود ماذا بيكم هههههه باي
موضوع: بوقالات من قلب الجزائر 
